नवलपरासीमा एकै ठाउँमा ६७ वटा गिद्ध मृत फेला 

बुटवल- नवलपरासी (बर्दघाट सुस्ता पश्चिम) मा विश्वकै लोपउन्मुख पंक्षी गिद्धको ठूलो बथान नै मृत फेला परेको छ।

रामग्राम नगरपालिका वडा ४ जितपुरमा ६७ वटा गिद्ध मृत फेला परेका हुन्। स्थानीयका अनुसार ६८ वटा गिद्धमध्ये ६७ वटा गिद्धको आहार लिएको केहीबेरमै मृत्यु भएको छ। एउटा गिद्ध भने बिरामी अवस्थामा फेला परेको छ। बिरामी गिद्धको उपचार भइरहेको छ। नेपाल पंक्षी संरक्षण संघको टोलीले गिद्धको मृत्युको कारणबारे अनुसन्धान गर्न घटनास्थल पुगेको छ। स्थानीयका अनुसार उक्त क्षेत्रमा मारेर फालिएको कुकुरको सिनो खान गिद्धको समूह त्यहाँ पुगेको थियो। 

स्थानीयका अनुसार जितपुरका एक व्यक्तिले एउटा कुकुरलाई विष खुवाएर मारेर फालेका थिए। विषले कुकुरको खाएकै कारण गिद्धमा फुड पोईजन भएर गिद्धको मृत्यु भएको प्रारम्भिक अनुसन्धान फेला परेको नेपाल पंक्षी संरक्षण संघका प्रतिनिधि देउबहादुर रानाले बताए। उनका अनुसार यति ठूलो संख्यामा एकैपटक विरलै गिद्धको मृत्यु हुने गरेको थियो। 

संरक्षण गर्नुपर्ने लोपोन्मुख गिद्धको लस्करै मरेको दृश्यले पंक्षी संरक्षणमा लाग्ने जो कोहीको मन विरक्त हुन्छ। मंगलबार दिउँसो ३ बजेको समयमा ती गिद्धहरु सिनो खाएर अचानक विरामी भएर धमाधम मर्न थालको स्थानीयलाई उदृत गर्दै पंक्षी संरक्षणकर्मी रानाले बताए।

गिद्ध बिरामी भए पनि तुरुन्तै उपचार पाएको भए बचाउन सकिने संरक्षकर्मीहरु बताउछन्। लोपउन्मूख गिद्धको मृत्यूले ठूलो क्षति पुगेको बताइएको छ। मृत्यू भएकामा अतिसंकटापन्न गिद्ध ३१ वटा, सानो खैरो अतिसंकटापन्न गिद्ध एउटा, हिमाली संकटापन्न ३३ र राजगिद्ध संरक्षित २ वटा छन्। 

मृतक गिद्धलाई एकै ठाउँमा संकलन गरिएको छ। मृतक गिद्धहरुको पोष्ट मार्टम गर्न राष्ट्रिय निकुञ्ज चितवनको चिकित्सक टोलीसहित घटनास्थलमा पुगेको छ। विषादी दिएर कुकुर मारेर खुल्ला ठाउँमा फाल्ने व्यक्तिकोसमेत खोजी कार्य भैरहेको प्रशासनले जनाएको छ।