लकडाउन घोषणालगत्तै दिल्लीका मदिरा पसलमा भीड

काठमाडौं– राज्य सरकारले एक साता लामो लकडाउन घोषणा गरेलगत्तै भारतको राजधानी नयाँ दिल्लीका मदिरा पसलमा उपभोक्ताको भीड लागेको छ।

मदिरा पसलमा मानिसको भीड बढेपछि प्रहरीसमेत खटिएका छन्। गत वर्ष पनि लकडाउन घोषणा भएपछि त्यहाँका मदिरा पसलमा उपभोक्ताको लामो लाइन लागेको थियो।

आज राति १० बजेदेखि अर्को सोमबार बिहान ५ बजेसम्मका लागि त्यहाँ लकडाउन घोषणा गरिएको भारतीय सञ्चारमाध्यमले जनाएका छन्। कोरोना संक्रमितको संख्या लगातार बढ्न थालेपछि दिल्ली राज्य सरकारले लकडाउन लगाएको हो। 

मुख्यमन्त्री अरविन्द केजरीवालले आज सोमबार रातिदेखि अर्को सोमबार बिहानसम्मका लागि लकडाउन घोषणा गरेका छन्। यो समयमा दिल्ली छोडेर कतै नजान पनि उनले अनुरोध गरेका छन्। 

लकडाउनले कोरोना नियन्त्रण नहुने बताउँदै उनले यसको गति नियन्त्रण गर्नमात्रै लकडाउन घोषणा गरिएको प्रष्ट पारे। यसबीचमा अस्पतालमा बेड थपिने र औषधि तथा अक्सिजनको पर्याप्त व्यवस्था गरिने उनले आश्वासन दिएका छन्।