पर्सा– पर्सामा ५१ वर्षिया कोरोना संक्रमित महिलाको मृत्यु भएको छ। खोकी, ज्वरो र श्वासप्रश्वासमा समस्या भएपछि नारायणी अस्पताल वीरगन्जमा भर्ना भएकी संक्रमित महिलाको मृत्यु भएको हो।
शनिबार साँझ अस्पताल भर्ना भएकी महिलाको उपचारका क्रममा मृत्यु भएको अस्पतालका कोभिड संयोजक सरोजराज दासले बताए।
पर्सामा चैतयता ३२५ जना कोरोना संक्रमित थपिएका छन् भने संक्रमितमध्ये ४ जनाको मृत्यु भएको छ। हाल ३ महिलासहित १६ जना कोरोना संक्रमितको आईसीयूमा उपचार भइरहेको छ। पर्सामा कोरोना संक्रमितका लागि व्यवस्थित आइसोलेसन छैनन्।
जटिल किसिमका समस्या भएकालाई मात्र नारायणी अस्पतालले भर्ना लिने गरेको छ। आईसीयूसमेत ४० जनामात्रै बिरामी राख्न मिल्ने भएकाले संक्रमित बढ्दै गए उपचार गर्न समस्या हुने संयोजक दासको भनाइ छ।
प्रकाशित: Apr 18, 2021| 10:34 आइतबार, वैशाख ५, २०७८
