ओली सरकारलाई ठेगान लगाउने अन्तिम तयारी भइरहेको छ : प्रचण्ड

चितवन- नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल 'प्रचण्ड'ले केपी शर्मा ओली नेतृत्वको वर्तमान सरकारलाई ठेगान लगाउने अन्तिम तयारी भइरहेको बताएका छन्। 

चितवनको माडीमा आयोजित एक कार्यक्रमलाई सम्बोधन गर्दै अध्यक्ष प्रचण्डले यस्तो बताएका हुन्। 

'अलोकतान्त्रिक र निरंकुश केपी शर्मा ओलीको सरकारलाई ठेगान लगाउने अन्तिम तयारीमा हामी छौँ,' अध्यक्ष प्रचण्डले भने। 

उनले कर्णालीमा जस्तै केन्द्र सरकारलाई पनि परिवर्तन गर्ने तयारी भइरहेकोसमेत बताए। 'कर्णालीमा जे भयो तपाईं-हामीले देखेका छौँ। गण्डकी र लुम्बिनीमा पनि तयारी भइरहेको छ। केन्द्रमा नै एउटा नयाँ कालापलट हुँदैछ। हुनैपर्छ। निरंकुश र स्वेच्छाचारी तत्वबाट उन्मुक्ति हुनैपर्छ, हुन्छ,' अध्यक्ष प्रचण्डले भने। 

उनले इतिहासलाई पछि धकल्ने दुस्साहस भइरहेको समेत उल्लेख गरे। संविधानले प्रत्याभूति गरेका उपलब्धि उल्ट्याउने प्रयास भइरहेको भन्दै त्यसको प्रतिकार गर्नुपर्ने उनको भनाइ छ।