साँझ ६ बजे शपथ लिँदै कर्णालीका ३ मन्त्री

सुर्खेत- शनिबार नियुक्त भएका कर्णाली प्रदेशका तीन जना मन्त्रीहरूको सपथ आइतबार साँझ ६ बजे हुने भएको छ।

नवनियुक्त मन्त्रीहरू नन्दसिं बुढा, अमरबहादुर थापा र कुर्मराज शाहीलाई प्रदेश प्रमुख गोविन्दराज कलौनीसँग पद तथा गोपनीयताको शपथग्रहण गराउने कार्यक्रम रहेको मुख्यमन्त्री तथा मन्त्रिपरिषद्‍को कार्यालयले जानकारी दिएको छ। 

शनिबार मुख्यमन्त्री महेन्द्रबहादुर शाहीले भूमि व्यवस्था, कृषि तथा सहकारी मन्त्रालयको जिम्मेवारी नन्दसिं बुढा, भौतिक पूर्वाधार विकास मन्त्रालयको जिम्मेवारी अमरबहादुर थापा र उद्योग, पर्यटन, वन तथा वातावरण मन्त्रालयको जिम्मेवारी कुर्मराज शाहीलाई दिएका थिए। 

नवनियुक्त तीनै जना नेपाल कम्युनिस्ट पार्टीको (एमाले)को माधवकुमार नेपाल समूहका नेताहरू हुन्। उनीहरू तीनै जनाले शनिबार मुख्यमन्त्री महेन्द्रबहादुर शाहीलाई विश्वासको मत दिएका थिए।

पार्टीको ह्विप विपरित शुक्रबार मुख्यमन्त्रीलाई विश्वासको मत दिएपछि नेकपा एमाले प्रदेश कमिटीले तीन जना सांसदलाई शनिबार पार्टीबाट निष्काशन गरिसकेको छ।