काठमाडौं - नेपाली कांग्रेसका सभापति शेरबहादुर देउवाले बहुमतको सरकारसँग निहुँ नखोज्ने बताएका छन्। केपी शर्मा ओली नेतृत्वको सरकार अहिले पनि बहुमतकै भएको उनको भनाइ छ।
आइतबार आफ्नो निवास बूढानीलकण्ठमा श्रीराम श्रेष्ठद्वारा लिखित कृति नेपाली जनजातीय संस्कार र संस्कृति विमोचन गर्दै सभापति देउवाले बहुमतको सरकारसँग निहुँ खोजिरहनुको कुनै अर्थ नभएको बताए।
नेकपा माओवादी केन्द्रले समर्थन फिर्ता नलिँदासम्म ओली नेतृत्वको सरकार बहुमतमै रहने भएकाले विकल्प सोच्ने बेला नभएको देउवाको भनाइ छ। ‘अहिले पनि ओली नेतृत्वको सरकार बहुमतकै सरकार हो। बहुमतको सरकारमा हामीले निहुँ खोज्ने कुरा छैन,’ उनले भने।
प्रधानमन्त्रीका लागि आफूले मरिहत्ते नगरेको भन्दै परिस्थिति आए नेतृत्व गर्नबाट पछि भने नहट्ने देउवाको भनाइ छ।
प्रकाशित: Apr 18, 2021| 07:19 आइतबार, वैशाख ५, २०७८
