रामबहादुर थापा पुन: गृहमन्त्रीमा नियुक्त, आजै साँझ शपथ

काठमाडौं - पदमुक्त भएका रामबहादुर थापालाई सरकारले पुन: गृहमन्त्रीमा नियुक्त गरेको छ।

संविधानकाे धारा ७८ (२) अनुसार उनलाई ६ महिनाका लागि गृहमन्त्रीमा नियुक्त गरिएकाे हाे। संविधानको उक्त उपधारामा यसरी मन्त्रीमा नियुक्त व्यक्ति ६ महिनाभित्र सांसद भइसक्नुपर्छ। 

प्रधानमन्त्री केपी शर्मा ओलीका प्रेस सल्लाहकार सूर्य थापाले दिएको जानकारीअनुसार थापालाई आजै बेलुकी ५ बजे पद तथा गाेपनीयताकाे शपथ ग्रहण गराउने कार्यक्रम छ।

गृहमन्त्री थापा एमालेमा लागेपछि माओवादीले उनलाई कारबाही गरेको थियो। माओवादीले चैत २७ गते थापाले दलत्याग गरेको जानकारीसहितको पत्र संसद सचिवालयमा दर्ता गरेको थियो। 

पार्टीको कारबाहीसँगै गृहमन्त्री रहेका थापाको राष्ट्रियसभा सदस्य पद गुमेको थियाे। राष्ट्रियसभा सदस्य नरहँदा उनको गृहमन्त्री पद पनि गुमेकाे थियाे।

सो पत्रपछि राष्ट्रिय सभा अध्यक्षले थापाको राष्ट्रियसभा सदस्य पद रिक्त भएको निर्णय गरेका हुन्। संसद सचिवालयले आज थापाको पद रिक्त भएको सूचना प्रकाशित गरेको छ। थापा बागमती प्रदेशबाट राष्ट्रियसभा सदस्य बनेका थिए।