धनुषामा बस र टिपर ठोक्किए, १७ जना घाइते 

जनकपुरधाम- धनुषामा बस र टिपर एक आपसमा ठोक्किँदा १७ जना घाइते भएका छन्। मिथिला नगरपालिका-९ लालगढमा शनिबार दिउँसो बस र टिपर ठोक्किदा बसमा सवार १७ जना घाइते भएका हुन्। 

धनुषाका प्रहरी प्रवक्ता एवम् प्रहरी नायब उपरीक्षक मकेन्द्र कुमार मिश्रले जानकारी दिए। पूर्वपश्चिम लोकमार्गमा वीरगंजबाट विराटनगर तर्फ जाँदै गरेको प्रदेश २-०३-००१ क ०६९० नम्बरको टिपर र को १ ख ६६९१ नम्बरको बस एक आपसमा ठोक्किएका थिए।

घाइतेमध्ये एक जनाको अवस्था गम्भीर रहेको धनुषा प्रहरीले जनाएको छ। 

दुर्घटनामा बस चालक ४२ वर्षीय केशव संग्रौलाको दुवै खुट्टा र हातमा गम्भीर चोट लागेको छ। त्यस्तै पर्साका रानीघाट ८ का ४० वर्षीय नन्दु बैठा, मोरङ विराटनगर महानगरपालिका-४ का ४५ वर्षीय बद्री भुजेल, सप्तरी हरीपुर चितामन-७ का ३० वर्षीया आशादेवी चौधरी, सप्तरी कञ्चनपुरका महिनारायण पण्डित घाइते भएका छन्। 

यस्तै सर्लाही बाग्मती नगरपालिका-८ की पर्वता ठकुरी, हरिपुर नगरपालिका-१ की यमकुमारी खड्का, हरिवन-५ का सुजित महरा, अभिषेक महरा, सर्लाही बागमती नगरपालिकाकी रामप्यारी देवी महतो, ईश्वरपुर नगरपालिकाकी सोनु कुमारी महतो, पर्सा वीरगञ्जकी अस्मिता पटेल, सम्झना पटेल, आयुष पटेल, अंश पटेल, रितेश पटेल र सिरहा गोलबजारका रुपा शाही ठकुरीलगायत घाइते छिन्।

घाइतेहरूको मोडल अस्पताल लालगढमा उपचार भइरहेको छ।