कोहलपुरमा टिपरसँग बस ठोक्कियो, ५ जनाको मृत्यु, ३० घाइते

सुर्खेत- सुर्खेतबाट काठमाडौंतर्फ जाँदै गरेको यात्रुबाहक बस कोहलपुरमा टिप्परसँग ठोक्किएर दुर्घटना भएको छ। दुर्घटनामा परी कम्तीमा ५ जनाको मृत्यु भएको र ३० भन्दा बढी यात्रु घाइते भएको प्रहरीले जानकारी दिएको छ। 

लुम्बिनी प्रदेश प्रहरी कार्यालयका प्रवक्ता राजेन्द्रसिंह खड्काका अनुसार सुर्खेतबाट ३९ जना यात्रु बोकेर छुटेको मे १ ख ३३४७ बस शुक्रबार बेलुका करिब ६ बजेतिर कोहलपुर नगरपालिका-१२ रोहिणी खोला नजिकै टिपरसँग ठोकिएको दुर्घटनामा परेको हो। 

'दुर्घटनास्थलमा नै एक जनाको मृत्यु भएको थियो। उपचारका लागि अस्पताल लैजाने क्रममा थप चार जनाको पनि मृत्यु भएको छ,' प्रदेश प्रहरी कार्यालयका प्रवक्ता राजेन्द्रसिंह खड्काले भने। 

उनका अनुसार मृतक र घाइतेहरुको विवरण खुलेको छैन। घाइतेमध्ये ९ जनाको अवस्था गम्भीर छ। घाइतेहरू सबैको नेपालगञ्ज मेडिकल कलेज शिक्षण अस्पताल कोहलपुरमा उपचार भइरहेको छ।