भेरी अस्पतालमा एक वर्ष यताकै उच्च संक्रमण पुष्टि

काठमाडौं - भेरी अस्पताल प्रयोगशाला नेपालगन्जमा पछिल्लो २४ घण्टामा परीक्षण गरिएका स्वाबमध्ये झण्डै ७० प्रतिशतमा कोभिड–१९ पोजिटिभ देखिएको छ। 

अस्पतालका अनुसार नेपालमा कोरोना संक्रमण सुरु भएदेखिकै सबैभन्दा धेरै संक्रमित भेटिएको यो पहिलोपटक हो। 

अस्पतालमा १८३ वटा नमुना परीक्षण गर्दा १२७ जनामा कोभिड–१९ को संक्रमण पुष्टि भएको छ, जुन पोजेटिभिटी रेट ६९.४ प्रतिशत हुन आउँछ। ‘एकै दिन यति धेरै संख्यामा संक्रमित पहिचान भएको विगत एक वर्षमा यो पहिलो पटक हो,’ अस्पताल प्रयोगशालाले भनेको छ, ‘यसले कोभिड–१९ को संक्रमण समुदायस्तरमा व्यापकरूपमा फैलिसकेको इंगित गर्छ।’ 

यही क्रममा संक्रमण फैलिने हो भने गम्भीर बिरामीहरूको संख्या बढ्ने र बिरामीको चाप थेग्न मुस्किल हुने अस्पतालले भनेको छ। 

संक्रमणलाई थप फैलिन नदिन सरकारले अनुरोध गरेबमोजिमका सुरक्षाका मापदण्डहरूको पूर्ण पालना गर्न अस्पतालले अनुरोध गरेको छ। 

भेरी अस्पतालमा कोभिड–१९ पोजिटिभ देखिएका अधिकांश बाँकेका छन्। बाँकेमा मात्रै ९६ जनामा संक्रमण पुष्टि भएकाे छ।