काठमाडौं- गण्डकी प्रदेशसभाको चालू अधिवेशन अचानक अन्त्य गरिएपछि त्यहाँका प्रतिपक्षी दलहरुले अधिवेशन आह्वानको माग गर्दै समावेदन दर्ता गराएका छन्।
प्रतिपक्षी दल नेपाली कांग्रेस, नेकपा माओवादी केन्द्र र जनता समाजवादी पार्टी जसपाका २८ जना सांसदले हस्ताक्षर गरेर अधिवेशन आह्वानका लागि समावेदन दर्ता गरिएको कांग्रेस सांसद कुमार खड्काले नेपाल समयलाई जानकारी दिए।
उनका अनुसार आज बिहान सुरुमा माओवादी केन्द्रले सरकारलाई दिएको समर्थन फिर्ताको प्रस्ताव प्रदेशसभा सचिवालयमा दर्ता गराएको छ। त्यसपछि मुख्यमन्त्रीविरुद्ध अविश्वासको प्रस्ताव दर्ता गरिएको छ। अविश्वासको प्रस्तावमा कांग्रेस, माओवादी केन्द्र र जसपाका २८ जना सांसदको हस्तक्षर छ।
अविश्वासको प्रस्ताव दर्तापछि प्रदेशसभा बैठकको माग गर्दै समावेदन दर्ता गरिएको छ।
गण्डकी प्रदेश सरकारलाई दिएको समर्थन फिर्ता लिने घोषणा जनमोर्चाले गरेसँगै त्यहाँ हिजोदेखि नयाँ सरकार गठनको अभ्यास भएको थियो।
मुख्यमन्त्री पृथ्वीसुब्बा गुरुङविरुद्ध अविश्वासको प्रस्ताव दर्ताको चर्चा चलेपछि मुख्यमन्त्रीले राति नै प्रदेशसभाको चालू अधिवेशन अन्त्यको सिफारिस गरेका थिए।
मुख्यमन्त्रीले अविश्वासको प्रस्ताव आउने थाहा पाएर गलत तरिकाले बैठक अन्त्यको सिफारिस गरेको भन्दै कांग्रेस सांसद खड्काले आफूहरुले बैठक आह्वानका लागि समावेदन दर्ता गरेको जानकारी दिए।
उक्त प्रदेशमा जनमोर्चाले अविश्वासको प्रस्तावमा पनि हस्ताक्षर गरेको छैन भने अविश्वासको प्रस्तावको पक्षमा उभिने तर सरकारमा सहभागी नहुने घोषणा गरेको छ।
सम्बन्धित समाचार
प्रकाशित: Apr 15, 2021| 10:00 बिहीबार, वैशाख २, २०७८
