काठमाडौं– सरकारले अमेरिकी सहयोग परियोजना (मिलेनियम च्यालेन्ज कर्पोरेसन) सम्झौता संसद्बाट अनुमोदन गर्न प्रक्रिया अगाडि बढाउने भएको छ।
कानुन न्याय तथा संसदीय मामिलामन्त्री लीलानाथ श्रेष्ठले एमसीसी अगाडि बढाउन प्रधानमन्त्रीबाट निर्देशन भएकाले अब अनुमोदनमा लगिने बताएका हुन्।
प्रधानमन्त्री केपी शर्मा ओलीले बुधबार राष्ट्रका नाममा सम्बोधन गर्दै एमसीसी सम्झौता अनुमोदनमा ढिलाइ नगरिने बताएका थिए।
मन्त्री श्रेष्ठले संसद् सचिवालयमा बिहीबार पत्रकारसँग भने, ‘प्रधानमन्त्रीले एमसीसी अनुमोदनका लागि प्रक्रिया अगाडि बढाउन निर्देशन दिनुभएको छ। अब म म सभामुखसँग कुरा गर्छु। एमसीसी अगाडि बढाउँछौं।’
तत्कालीन अर्थमन्त्री ज्ञानेन्द्रबहादुर कार्कीले सन् २०१७ मा अमेरिकामा गएर गरेको ५५ अर्ब रुपैयाँको सडक र प्रसारण लाइनसम्बन्धी यो सम्झौता संसद्बाट अनुमोदन गर्नुपर्ने सर्त छ।
प्रकाशित: Apr 15, 2021| 09:24 बिहीबार, वैशाख २, २०७८
