पोखरा– नेकपा माओवादी केन्द्रले गण्डकी प्रदेशका मुख्यमन्त्री पृथ्वीसुब्बा गुरुङविरूद्ध अविश्वास प्रस्ताव दर्ता हुनुभन्दा केही समयअघि मात्र सरकारलाई दिएको समर्थन फिर्ता लिएको छ।
माओवादीले गुरुङ नेतृत्वको सरकारलाई दिएको समर्थन बिहीबार दिउँसो १ः२५ बजेदेखि फिर्ता लिएको हो। त्यसको १० मिनेटपछि मुख्यमन्त्री गुरुङविरूद्ध प्रदेश सभा सचिवालयमा अविश्वास प्रस्ताव दर्ता गरिएको छ।
माओवादी केन्द्रका संसदीय दलका नेता हरिबहादुर चुमानले मुख्यमन्त्री गुरुङलाई दिएको समर्थन फिर्ता लिएको पत्र सभामुखलाई बुझाएका हुन्। पत्रमा सरकारलाई दिएको समर्थन बिहीबारदेखि नै लागू हुने उल्लेख छ।
कांग्रेसका १५, माओवादीका ११ र जनता समाजवादी पार्टी दुई सांसद गरी २८ जना सांसदको हस्ताक्षरसहित प्रदेश सभा सचिवालयमा मुख्यमन्त्री गुरुङविरूद्ध अविश्वास प्रस्ताव दर्ता भएको छ।
