गण्डकीका दुई मन्त्रीले मुख्यमन्त्री गुरुङलाई बुझाए राजीनामा

पोखरा- गण्डकी प्रदेशमा दुई जना मन्त्रीहरूले राजीनामा दिएका छन्। नेपाल कम्युनिस्ट पार्टी (माओवादी केन्द्र)का दुई मन्त्रीले मुख्यमन्त्री पृथ्वीसुब्बा गुरुङलाई राजीनामा बुझाएका हुन्। 

भूमि व्यवस्था, कृषि तथा सहकारीमन्त्री लेखबहादुर थापा र आन्तरिक मामिला तथा कानुनमन्त्री हरिबहादुर चुमानले राजीनामा दिएका हुन्। ०७४ फागुन ४ गते दुवैजना मन्त्री भएका थिए।

माओवादी केन्द्रका तर्फबाट सरकारमा सहभागी भएका मन्त्रीहरू फिर्ता भएपनि उसले सरकारलाई दिएको समर्थन भने फिर्ता लिएको छैन। 

बुधबारै बसेको माओवादी केन्द्रको संसदीय दलको बैठकले मन्त्री फिर्ता बोलाउने निर्णय गरेको थियो।

बुधबारको प्रदेशसभा बैठकमा आफूहरूको राजीनामाबारे चुमानले सम्बोधन गरेका थिए। पार्टी विभाजनको निर्णय अदालतले गरिदिएको भन्दै उनले असन्तुष्टि व्यक्त गरे। 

प्रधानमन्त्री केपी शर्मा ओलीले नै प्रदेश र स्थानीय तह कमजोर पार्ने काम गरेको आरोपसमेत उनले लगाएका थिए।