ममाथि बम प्रहार गर्ने साथीलाई गृहमन्त्री बनाएर गल्ती गरें : दाहाल

सुर्खेत– नेकपा माओवादी केन्द्रका अध्यक्ष पुष्पकमल दाहालले रामबहादुर थापा ‘बादल’ लाई गृहमन्त्री बनाउनु ठूलो भूल भएको बताएका छन्।

जनआन्दोलन दिवसका अवसरमा मंगलबार रुकुम पश्चिममा आयोजित बृहत् जनसभालाई सम्बोधन गर्दै दाहालले यस्तो बताएका हुन्। बादल माओवादी छाडेर एमाले प्रवेश गरेका छन्।

‘जस्तो दुःख पर्दा पनि मेरो प्रचण्ड भन्ने हिँड्ने नेता कार्यकर्तालाई ओझेलमा परे’, दाहालले आत्मालोचना गर्दै भने,  ‘२०७० सालको चुनावमा ममाथि बम प्रहार गर्ने साथीलाई गृहमन्त्री बनाएर मैले गल्ती गरें।’

२०७० सालको निर्वाचनमा आफू केही सेकेन्डले मात्रै बम आक्रमणबाट बचेको उनको भनाइ थियो। २०७० सालको दोस्रो संविधानसभामा मोहन वैद्य नेतृत्वको नेकपा क्रान्तिकारीले चुनाव बहिष्कार गरेको थियो। उतिबेला थापा वैद्यको दलमा थिए।