कर्णालीमा नयाँ सरकार गठनको गृहकार्य सुरु

सुर्खेत– कर्णाली प्रदेशमा नेकपा (एमाले)ले आफ्नै नेतृत्वमा नयाँ सरकार गठन गर्न गृहकार्य थालेको छ। 

एमालेबाट सरकारमा सहभागी मन्त्रीहरुले राजीनामा दिएसँगै उसले नयाँ सरकार गठनको गृहकार्य थालेको हो। मन्त्रीहरुले पदबाट राजीनामा दिएलगत्तै बसेको एमाले संसदीय दलको बैठकले नयाँ सरकार गठनका लागि प्रदेश सभामा प्रतिनिधित्व गर्ने दलहरुसँग छलफल गर्ने निर्णय गरेको छ।

दलको बैठकले नयाँ सरकार गठनका लागि प्रदेश सभामा प्रतिनिधित्व गर्ने दलहरुसँग समन्वय र सहकार्य गर्ने जिम्मेवारी एमाले संसदीय दलका नेता यामलाल कँडेललाई दिएको छ।

४० सदस्यीय प्रदेशसभामामा माओवादीबाट एमालेमा प्रवेश गरेका सांसद धर्मराज रेग्मी कारबाहीमा परिसकेका छन्। हाल प्रदेश सभामा कायम रहेका ३९ सांसदमध्ये २० जनाको समर्थनमा बहुमत प्राप्त गरेर सरकार गठन गर्न सकिन्छ।

एमालेसँग सभामुखसहित २० जना सांसद छन्। तर, सभामुख राजबहादुर शाहीले निर्णायक मतमात्रै दिन पाउँछन्। जसका कारण अब नयाँ सरकार गठनका लागि एमालेलाई एक जना सांसदको समर्थन आवश्यक छ।

कर्णाली प्रदेश सभामा ३९ सांसदमध्ये माओवादी केन्द्रका १२, कांग्रेसका ६ र राप्रपाका एक जना छन्। एमालेले राप्रपा सांसदको समर्थनमा कर्णालीमा नयाँ सरकार गठन गर्नसक्छ। दलको बैठकले एमाले संसदीय दलको विधानसमेत संशोधन गरेको सांसद प्रकाश ज्वालाले जानकारी दिए।