पत्रकार महासंघलाई सरकारको प्रतिछाया बन्न नदिन पूर्व अध्यक्षहरुको आग्रह

काठमाडौं- नेपाल पत्रकार महासंघलाई सरकारको प्रतिछाया बन्न नदिन महासंघका पूर्व अध्यक्षहरुले आग्रह गरेका छन्।

महासंघका पूर्व अध्यक्ष एवम् पूर्व सभापतिहरुले मंगलबार संयुक्त वक्तव्य जारी गर्दै महासंघलाई सरकारको प्रतिछाया बन्न नदिन आग्रह गरेका हुन्।

‘नेपाल पत्रकार महासंघलाई सरकारको प्रतिछाया तथा राजनीतिक दलको स्वार्थबाट जोगाउन र समाजको निरन्तर लोकतान्त्रिकरणका लागि दिशाबोध गर्न सक्ने बनाइराख्न आवश्यक छ’ संयुक्त वक्तव्यमा भनिएको छ।

‘प्रेस स्वतन्त्रता अहिले पनि चुनौतीको घेरामा रहेकाले यसको रक्षाको लागि महासंघका सबै तहमा जुझारु र निष्ठावान नेतृत्व आवश्यक हुन्छ।’ पूर्व अध्यक्ष एवम् पूर्व सभापतिहरुले भनेका छन्।

हरिहर विरही, किशोर नेपाल, सुरेश आचार्य, तारानाथ दाहाल, विष्णु निष्ठुरी र धर्मेन्द्र झाले हस्ताक्षर गरेको वक्तव्यमामा चुनावमा सबै पत्रकारहरु उत्साहपूर्वक सहभागी हुन आह्वान समेत गरिएको छ।