नेता जोशीको निधनप्रति कांग्रेसको शोक प्रस्ताव पारित, तीन दिन पार्टी झन्डा आधा झुकाइने

काठमाडौं - नेपाली कांग्रेसले नेता नविन्द्रराज जोशीको निधनप्रति गहिरो दु:ख व्यक्त गरेको छ।

पार्टी कार्यालय सानेपामा आकस्मिक बसेको केन्द्रीय समिति बैठकले जोशीको निधनप्रति दु:ख व्यक्त गर्दै श्रद्धाञ्जली अर्पण गरेको छ। बैठकले जोशीको निधमा शोक प्रस्ताव पारित गरेको छ।

बैठकले नेविसंघका पूर्वमहामन्त्री, काठमाडौंमा पूर्वउपमेयर, संविधानसभा सदस्य तथा पूर्वमन्त्रीसमेत रहेका नेता जोशीको निधनले मर्माहत र स्तब्ध भएको कांग्रेसले जनाएको छ।

बैठकपछि कांग्रेस पार्टी कार्यालयका मुख्य सचिव कृष्णप्रसाद पौडेलद्वारा विज्ञप्तिमा भनिएको छ, 'नेपाली कांग्रेसले एक कुशल संगठक र सिङ्गो मुलुकले एक क्षमतावान नेतृत्वलाई गुमाएको छ। उहाँको निधनबाट पार्टी र सिंगो मुलुकलाई अपूरणीय क्षति पुगेको छ। नेता जोशीको निधनप्रति नेपाली कांग्रेसको यो आकस्मिक बैठक गहिरो दुःख व्यक्त गर्दै भावपूर्ण श्रद्धाञ्जली अर्पण गर्दछ । साथै, उहाँको आत्माको चीर शान्तिको कामना साथ शोकसन्तप्त परिवारजनप्रति गहिरो समवेदना प्रकट गर्दछ।'

त्यस्तै जोशीप्रति सम्मान प्रकट गर्दै चैत १५, १६ र १७ गते तीन दिनसम्म पार्टीको केन्द्रीय कार्यालय र सबै जिल्ला कार्यालयहरुमा पार्टीको झण्डा आधा झुकाउने र उक्त दिनहरुमा शोकका कार्यक्रमहरू बाहेक पार्टीका अरु औपचारिक कार्यक्रमहरु नगर्ने निर्णय गरिएको मुख्य सचिव पौडेलले जानकारी दिएका छन्।

चैत १७ गते मंगलबारका दिन केन्द्र तथा सबै जिल्ला कार्यालयहरु बन्द गर्ने र १३ औं दिनसम्म केन्द्रीय कार्यालय र सबै जिल्ला कार्यालयहरूमा शोक पुस्तिका राख्ने पनि कांग्रेसले निर्णय गरेको छ।

जोशीको १३औं दिनको पुण्यतिथिमा केन्द्र र सबै जिल्लामा भौतिक दूरी कायम गर्दै शोकसभाको आयोजना गरिने पनि कांग्रेसले जनाएको छ।

मस्तिष्कघात भई एक महिनादेखि नर्भिक अस्पतालमा उपचाररत ५७ वर्षीय जोशीको शुक्रबार राति निधन भएको हो।