ओली नेतृत्वको सरकार अधिनायकवादतर्फ उन्मुख : प्रकाशमान सिंह

लहान - नेपाली कांग्रेसका नेता प्रकाशमान सिंहले केपी ओली नेतृत्वको सरकार अधिनायकवादतर्फ उन्मुख भएको बताएका छन्। 

नेवा समाज लहानले शुक्रबार सिरहाको लहानमा आयोजना गरेको कार्यक्रममा बोल्दै उनले मोबाइलबाट प्रधानमन्त्रीको फोटो खिच्न रोक लगाइनु यसकै उदाहरण भएको बताए।

‘मलाई सुनेरै अचम्म लागेको छ। समाचार सत्य हो भने उनी कस्ता रहेछन् भन्ने देखाउँछ,’ उनले भने, ‘ओलीमा तानाशाही चरित्र देखिँदै जाँदा अहिले फरक मत राख्ने एमालेभित्रको एउटा समूह तथा माओवादी केन्द्र सुरुका दिनमा मौन बसेको र समयमै लगाम लगाउन नसक्दा अहिले यस्तो समस्या आएको हो।’

उनले अहिले जसपाले नैतिकताहीन सरकारसँग माग पूरा गर भन्नु गलत भएको उनको भनाइ छ।

‘हिजो कोही मन्त्री बन्ने, कोही सरकारलाई समर्थन दिएर बसेकै हुन्। दुई तिहाइ हुँदा अहिले उठाएका मुद्दा समाधान गर्न ध्यान दिइएन,’ उनले भने, ‘मधेसका जायज माग पूरा गर्न तयार छौं। बहानाबाजी नगरी ओलीको बिदाइमा प्रस्ट हुन म अपिल गर्न चाहन्छु।’ 

नेकपा माओवादी केन्द्रले सरकारलाई  दिएको समर्थन फिर्ता लिएसँगै नयाँ सरकार गठनको प्रक्रिया सुरू हुने उनको भनाइ छ।