एमालेको माधव–झलनाथ पक्षले बोलायो केन्द्रीय कमिटी बैठक

काठमाडौं– समानान्तर गतिविधि अगाडि बढाइरहेको नेकपा एमालेको माधव–झलनाथ पक्षले केन्द्रीय कमिटीको बैठक बोलाएको छ।

केन्द्रीय कमिटीको बैठक शुक्रबार बिहान ११ बजेका लागि बोलाइएको केन्द्रीय सदस्य राजेन्द्र राईले जानकारी दिए।

‘पछिल्लो राजनीतिक घटनाक्रम र पार्टीभित्र देखिएको विवादका विषयमा छलफल गर्न बैठक बोलाइएको हो,’ उनले भने, ‘सबैलाई उपस्थित हुन भनिएको छ। उपत्यकाबाहिरका साथीहरु आउन नसके पनि यहाँ उपलब्ध केन्द्रीय सदस्यहरु सहभागी हुनेछन्।’ 

राजनीतिक, वैचारिक रूपमा विभाजनको रेखा कोरिसकेको माधव–झलनाथ पक्षले सांगठनिक आधार पनि बनाइरहेको छ। 

अहिलेसम्म युवा संघ, महिला संघ र विद्यार्थीको भेला आयोजना गरेर समानान्तर कमिटी गठन गरिएको छ। 

माधव–झलनाथ पक्षले पार्टी विभाजन होस् भन्ने आफूहरुको चाहना नरहेको बताउँदै आएको छ। 

‘पार्टी अध्यक्ष केपी ओली विधानअनुरूप, सर्वोच्च अदालतको फागुन २३ को फैसलाअनुसार चल्नुपर्यो भन्ने हाम्रो माग रहँदै आएको छ,’ एक केन्द्रीय सदस्यले भने, ‘उहाँ २०७५ जेठ २ मै फर्कन नचाहेर एकलौटी अघि बढेकाले समस्या उत्पन्न भएको हो।’ 

चैत ७ गते अध्यक्ष ओलीले केन्द्रीय कमिटीको बैठक राखेर चारजना नेताहरुलाई स्पष्टीकरण सोध्ने निर्णय गरेपछि एमाले विभाजनकै अवस्थामा पुगेको छ। 

नेताहरूले स्पष्टीकरण सार्वजनिक रुपमा र त्यससँगै अध्यक्ष केपी शर्मा ओलीलाई प्रश्न पनि गर्ने तयारी गरिरहेका छन्। 

बुधबार मनमैजुस्थित एक नेताको घरमा लामो छलफल गरेका नेताहरू बिहीबार पनि छलफलमा जुट्ने बताइएको छ। 

अध्यक्ष केपी ओलीले नै एमालेलाई विभाजन गर्ने हिसाबले नै अघि बढिरहेको माधव–झलनाथ पक्षको बुझाइ छ।