खाद्यान्न आयात गर्ने जाजरकोटको मकै देशका ठूला सहरमा

जाजरकोट– वर्षेनी खाद्यान्न आयात गर्ने जजारकोटबाट अब खाद्यान्न निर्यात हुन थालेको छ। 

जिल्लाका विभिन्न ठाउँमा यातायातको सहज पहुँच भएसँगै स्थानीय बासिन्दाले उत्पादन गरेको खाद्यान्न बाहिर जिल्लाबाट निर्यात गर्न थालिएको हो।

अहिले जाजरकोटको भेरी नगरपालिकाबाट मात्र वार्षिक रूपमा ३०० क्विन्टलभन्दा बढी देउती जातको मकै देशका ठूला शहरमा बिक्री भइरहेको भेरी नगरपालिका कृषि शाखाका प्रमुख यज्ञ अधिकारीले जानकारी दिए। यो मकै गाउँमा प्रतिपाथी १०० मा बिक्री भइरहेको उनले बताए। 

चार वर्षदेखि मकैको बीउ उत्पादन गरी कृषकलाई आत्मनिर्भर बनाउन लागेको कृषि शाखाले तीव्र रूपमा काम हुँदा अहिले जिल्ला बाहिर बिक्रीका लागि पठाउन सुरु गरेको बताए।

भेरी नगरपालिका ७ रुपाकोट, चौरटोलमा १० हेक्टर जमिनमा मकैको बीउ उत्पादन कार्य बर्सेनी हुँदै आएको छ। नगरपालिकाभित्र बाहिरबाट बीउ ल्याएर मकै लगाउनुपर्ने अवस्था अन्त्य भएको कृषकले बताए।

मकैको बीउलाई किराबाट जोगाउनका लागि मकै उत्पादन भण्डारण केन्द्र स्थापना गरी कामसमेत भइरहेको छ। विद्युत् र सडकमा सहज पहुँच छिटो बनाउन केन्द्रका स्थानीयवासीले माग गरेका छन्। 

रुपाकोटमा लेभलिङ, प्याकेजिङ र ग्रेडिङको काम सुरु भएको प्रमुख अधिकारीले जानकारी दिए। त्यस्तै जिल्लाको नलगाड नगरपालिका ५ रघुनाथलाई मकैको पकेट क्षेत्रका रूपमा अगाडि बढाइएको छ। यस वर्ष नयाँ ठाउँमा विस्तार अभियानमा रहेको कृषि शाखाका बालकृष्ण आचार्यले जानकारी दिए।

नलगाडबाट मात्र वर्षेनी ७०० क्विन्टलभन्दा बढी मकै बाहिरी जिल्लामा बिक्री हुने गरेको छ। लहँ, हल्चौर र डाँडागाउँमा बढी मकै उत्पादन गरिँदै आएको छ। उत्पादनका हिसाबले भेरी र नलगाड नगरपालिका राम्रो मानिन्छ।