कोरोनाले थलिएका कांग्रेस नेता विश्वकर्माको अनुभव– घर आएको १६ दिनमा पनि बोल्न सकेको छैन

काठमाडौं– नेपाली कांग्रेसका नेता मीन विश्वकर्माले आफ्नो उपचारमा खटिएका स्वास्थ्यकर्मीलाई धन्यवाद दिएका छन्।

कोरोना संक्रमणबाट थलिएर ३६ दिन अस्पतालमा उपचार गराई घर फर्किएका विश्वकर्माले विज्ञप्ति जारी गरेर उपचारमा खटिएका स्वास्थ्यकर्मीप्रति आभार व्यक्त गरेका हुन्।  

 ‘कोभिड–१९ बाट संक्रमित भई स्वास्थ्यमा समस्या आएका कारण कात्तिक ९ गते वीर अस्पताल र ११ गते स्वास्थ्य अवस्था झन् जटिल भएपछि राति ११ बजे धापासीस्थित ग्रान्डी अन्तर्राष्ट्रिय अस्पतालमा चिन्ताजनक अवस्थामा पुर्याइएको थिएँ। वरिष्ठ चिकित्सक सुभाष आचार्यको प्रत्यक्ष एवं आत्मिय निगरानीमा उक्त अस्पतालका चिकित्सकहरुको समूहसँगै अति स्नेही सेवा गर्ने नर्सहरुले मलाई पुनर्जीवन दिएको महशुस गरेको छु,’ उनले भनेका छन्। 

उनले आफ्नो उपचारमा सहयोग गर्ने र सद्भाव देखाउने पार्टीका नेताहरु, दलित आन्दोलनका सहयात्री, राष्ट्रपति, प्रधानमन्त्री, स्वास्थ मन्त्री लगायतलाई समेत धन्यवाद दिएका छन्। 

उनले अस्पतालबाट डिस्चार्ज भएको १६ दिनमा पनि राम्रोसँग बोल्न र हिँड्न नसकेको बताएका छन्।