लाेकतन्त्र समाप्त पार्ने खेलमा प्रधानमन्त्री नै लागेको मुख्यमन्त्री राउतको आरोप

पर्सा। प्रदेश २ का मुख्यमन्त्री लालबाबु राउतले संघीयता खारेज गर्ने पक्षमा नेपाल सरकार रहेको आरोप लगाएका छन्। 

वीरगञ्जस्थित एक स्थानीय रेडियोको वार्षिकोत्सव समारोहलाई सम्बोधन गर्दै उनले मन्त्रिपरिषद्‍बाटै ‘संघीय लोकतान्त्रिक गणतन्त्र’ हटाएर नेपाल सरकार मात्रै राख्ने गरी गरिएको निर्णय संघीयता विरोधी रहेको बताएका हुन्। 

संघीयता नचाहने प्रधानमन्त्री केपी शर्मा ओली नै विभिन्न समूहमार्फत् लोकतन्त्र समाप्त पार्ने खेलमा लागेको उनको आरोप छ।

‘मुलुकमा प्राप्त उपलब्धि खारेज गर्ने त्यस्ता खेलमा सरकारका पक्षधरहरू लागिपरेका छन्,’ उनले भने, ‘त्यसका विरुद्ध सञ्चारकर्मीहरूले सत्यतथ्य उजागर गर्नुपर्छ।’ 

संघीयताका निम्ति सञ्चारमाध्यमले निकै ठूलो भूमिका खेलेको उनले बताए। 

‘पुरातन सोचका कर्मचारीको जोडले मात्रै मिडिया विधेयक ल्याइएको हो,’ उनले भने, ‘व्यापक सुझाव पश्चात हामीले उक्त विधेयकलाई केही हदसम्म फितलो गरेका छौं।’

कार्यक्रममा प्रदेश २ का भौतिक पूर्वाधार तथा यातायात विकास मन्त्री जितेन्द्र सोनलले स्वतन्त्र प्रेस बनाउन प्रदेश सरकार लागेको बताए।