बिरामी बोलाउँदै वीर अस्पताल 

काठमाडाैं- चिकित्सका विज्ञान राष्ट्रिय प्रतिष्ठान वीर अस्पतालले कोभिड र ननकोभडि सबै प्रकारका बिरामीलाई  अस्पतालको  सेवा लिनका लागि आह्वान गरेको छ । 

सरकारले कोभिड अस्पताल बनाउने घोषणा गरेसँगै बिरामीको संख्या घटेपछि अस्पतालले सार्वजनिक सूचना जारी गर्दै अस्पतालको सेवा लिन आउन विरामीलाई आह्वान गरेको हो । 

सामान्य अवस्थामा ३ हजारको हाराहारीमा बिरामीहरु अस्पताल पुग्ने गरेकोमा अहिले ३ सय बिरामी पुग्न पनि मुस्किल भएको अस्पतालले जनाएको छ । 

अस्पतालका निर्देशक डा. केदार सेन्चुरीले सूचना नै जारी गरेर अन्य नियमित सेवालाई निरन्तरता दिएरै कोभिडको थप सेवा दिएको स्पष्ट पारेका छन् । सरकारले  वीर अस्पताललाई कोभिड अस्पताल बनाउने निर्णय गरेपछि वीरको सेवा प्रभावित भएको थियो । 

बिरामीको संख्या घट्न थालेपछि अस्पतालले कर्मचारी तथा स्वास्थ्यकर्मीलाई तलब समेत खुवाउन नसक्ने अवस्थामा पुगेको थियो ।

तलब भत्ता नपाएपछि चिकित्सक, स्वासथ्यकर्मी तथा कर्मचारीले ४६ दिनसम्म लामो आन्दोलन गरेर केही दिन अघिमात्रै सम्झौता भएको थियो । हाल अस्पतालले कर्मचारीलाई तलब खुवाउन निकै समस्या परेको निर्देशक डा. सेन्चुरीले बताए । 

हाल कोभिड, ननकोभिड सबै विरामीलाई साविकको अवस्थामै  सामान्य तथा विशेषज्ञ सेवा दिएको अस्पतालले जनाएको छ ।