चितवन निकुञ्‍जमा चाेरीशिकार बढ्दै, २४९ जना पक्राउ

चितवन। चितवन राष्ट्रिय निकुञ्जले चालु आर्थिक वर्षको हालसम्म विभिन्न चोरीशिकारका गतिविधिमा संलग्न भएको आराेपमा २४९ जनालाई पक्राउ गरेको छ। 

उनीहरूमध्ये तीनजना कारागार चलान भएका छन् भने अन्य कतिपयलाई मुद्दा चलाइएको छ। कतिपय ठाडो जरिवाना गरेर छाडिएको हो।

निकुञ्जका सूचना अधिकारी लोकेन्द्र अधिकारीका अनुसार पक्राउ परेकामध्ये सबैभन्दा बढी १२३ जना माछा मार्ने घटनामा संलग्न भएका हुन्।

यसैगरी घाँस दाउराका ६३ जना, बालुवा गिट्टीका २५ जना, काठका १३ जना, गैँडा चोरीशिकारीका एकजना र अन्य वन्यजन्तु तस्करीका २३ जना रहेको उनले जानकारी दिए। 

साउनमा १७ जना, भदौमा १०२ जना, असोजमा २१ जना, कात्तिकमा ५४ जना र मङ्सिरमा ५५ जना पक्राउ परेका हुन्।

निकुञ्जका प्रमुख संरक्षण अधिकृत अणनाथ बरालका अनुसार गैँडा तस्करीका एकजना र काठ तस्करीका दुईजना कारागार चलान भएका छन्। उनले पछिल्लो समय चोरीशिकारका घटना बढेसँगै सुरक्षामा कडाइ गरिएको बताए। 

पैदल, हात्ती, साइकल, डुंगा, गाडीलगायतबाट निकुञ्ज कर्मचारी र सेनाको संयुक्त टोलीले गस्ती गरिरहेको छ।

दिन र रातको समयमा निकुञ्जका संवेदनशील क्षेत्रमा गस्ती बढाइएको उनले जानकारी दिए।

चालु आर्थिक वर्ष सुरु भएयता चारवटा दुर्लभ एकसिङ्गे गैँडा तस्करले मारेको अवस्थामा फेला परेका छन्। यससँगै सुरक्षालाई थप कडाइ गरिएको हो। रासस