एसिड आक्रमण घटना : २ जनाविरुद्ध अभियोग पत्र दर्ता

जनकपुरधाम- श्रीमतीलाई एसिड आक्रमण गरी घाइते बनाएको घटनालाई लिएर जिल्ला सरकारी वकिलको कार्यालय जनकपुरले २ जनाविरुद्ध जिल्ला अदालत धनुषामा अभियोगपत्र दर्ता गराएको छ। 

गत कार्तिक २९ गते जनकपुरधाम वडा नम्बर ४ स्थित आरती साहमाथि उनकै श्रीमानले एसिड आक्रमण गरी घाइते बनाएका थिए।

सो घटनामा, जिल्ला अदालत धनुषामा २ जनाविरुद्ध अभियोग पत्र दर्ता गराइएको जिल्ला सरकारी वकिलको कार्यालयका जिल्ला न्यायाधिवक्ता सीताराम अर्यालले जानकारी दिए। उनका अनुसार आरतीका श्रीमान २६ वर्षीय सञ्जिव साह र नागेन्द्र साहमाथि अभियोग पत्र दर्ता गरिएको हो। 

सरकारी वकिलको कार्यालयले दुबै जनालाई १५ वर्ष ६ महिना सजाय हुने गरी अभियोग पत्र दायर गरिएको हो। 

जिल्ला न्यायधिवक्ता अर्यालले दुबै जनाविरुद्ध अंगभंग, कुरुप र एकीकृत कसुर गरी ३ कसुरको सजायका लागि मागदाबी गरिएको बताए। अंगभंगका लागि ५ वर्ष, कुरुप बनाएकोमा ८ वर्ष र एकीकृत कसुरको थप २ वर्ष ६ महिना गरी कुल १५ वर्ष ६ महिनाको सजाय माग गरिएको अभियोग पत्रमा उल्लेख छ। 

सो एसिड आक्रमणका लागि सञ्जिवले नागेन्द्र साहको निखिल स्टोरबाट एसिड खरिद गरेको पाइएको अर्यालले बताए। 
एसिड आक्रमणबाट आरतीको दाहिने आँखा गुम्नुका साथै घाँटी, छाती, स्तन लगायतका अंगमा गहिरो चोट परेको थियो। एसिड आक्रमणमा परी उनकै छोरी रियाको हातमा र टाउकोमा खत बसेको पाइएको छ।