अख्तियारको स्टिङ अपरेसनसम्बन्धी रिटको फैसला ८ माघमा हुने

काठमाडौं– अख्तियार दुरुपयोग अनुसन्धान आयोगको ‘स्टिङ अपरेसन’ विरुद्ध  परेको रिटमा सर्वोच्च अदालतले आफ्नो आदेश माघ ८ गते सुनाउने भएको छ। 

आज (बुधबार) को बहसपछि सर्वोच्च अदालतको संवैधानिक इजलासले निर्णय सुनाउन माघ ८ गते दुवै पक्षलाई बोलाएको छ।

प्रधानन्यायाधीश चोलेन्द्र शमशेर राणा, न्यायाधीश दीपककुमार कार्की,  मीरा खड्का,  हरिकृष्ण कार्की र ईश्वर खतिवडाको संवैधानिक इजलासले उक्त मुद्दामा सुनुवाई गरिरहेको छ।

अख्तियारले आफैं घुस दिएर गर्ने ‘स्टिङ अपरेसन’ संविधान र कानुनविपरीत भएको भन्दै अधिवक्ता विष्णु घिमिरेले गत वर्ष सर्वोच्चमा रिट दायर गरेका थिए।

अख्तियारलाई घुस रकम दिने अधिकार संविधान र कानुनले नदिएकाले उक्त नियम खारेज गर्न रिटमा माग गरिएको छ।

अख्तियारको अपरेसन संविधान र कानुनविपरीत भएको रिट निवेदनकर्ताको दाबी छ। अख्तियारले गत वर्ष आर्थिक वर्षमा विशेष अदालतमा दायर गरेका ४४० वटा भ्रष्टाचारका मुद्दामध्ये १८१ वटा मुद्दा स्टिङ अपरेसनका छन्।