डोटी जिप दुर्घटना अपडेट : वडा सचिवको परिवारसहित चार जनाको मृत्यु 

धनगढी- डोटीको सेउणीखेत पिउसिया भिरमा जिप दुर्घटना हुँदा ज्यान गुमाउनेको संख्या ४ पुगेको छ ।

दुुर्घटनामा बैतडी घर भएकी डोटीको बोगटान फुड्सिल गाउँपालिका–७ की वडा सचिव २८ वर्षीय मन्जु त्रिपाठी, उनको ३ वर्षे छोरा मनिष अवस्थी र सासु आमा डम्मरी अवस्थीको ज्यान गएको छ । 

दुर्घटनामा बोगटान फुड्सिल गाउँपालिकामा कार्यरत ग्रामीण जलश्रोत व्यवस्थापन परियोजनाका कृषि प्राविधिक हरी भट्टको समेत मृत्यु भएको छ ।

वडा सचिव त्रिपाठी, त्रिपाठीकी सासु आमा र कृषि प्राविधिक भट्टको घट्ना स्थलमै मृत्यु भएको र त्रिपाठीको छोरालाई उपचारको लागि दिपायल लैजादै गर्दा मृत्यु भएको जिल्ला प्रहरी कार्यालय डोटीले जनाएको छ । 

दुर्घटनामा ग्लोबल आईएमई बैँकमा कार्यरत सुरक्षा गार्ड टीकाराम गिरी, उनकी श्रीमती खेमा गिरी, खत्याडी माध्यामिक विद्यालयका शिक्षक हेमन्त भट्ट, चालक कैलाश बम घाइते भएका छन् । घाइतेहरुको अवस्था समान्य रहेको प्रहरीले जनाएको छ ।

आइतबार राति साढे १ बजे दिपायलबाट बोगटानतर्फ जाँदै गरेको म १ च ५५० नम्बरको जिप बोगटान फुड्सिल गाउँपालिका–७, सेउणीखेत पिउसिया भिरमा दुर्घटना भएको थियो ।