बुटवलमा तस्करले प्रहरीको हतियार खोसेर गोली चलाउँदा एक घाइते

काठमाडौं– बुटवलको एक होटलमा गैंडाको खाग तस्कर गर्ने गिरोहले प्रहरीको हतियार खोसेर गोली चलाउँदा एकजना गम्भीर घाइते भएका छन्।

घाइते हुनेमा काठमाडौं बस्ने ३० वर्षीय राकेश न्यौपाने छन्। उनको चिउँडो र घाँटीमा गोली लागेको जिल्ला प्रहरी कार्यालय रूपन्देहीका प्रहरी प्रवक्ता डीएसपी सत्यनारायण थापाले जानकारी दिए।

न्यौपानेको भैरहवास्थित लुम्बिनी प्रादेशिक अस्पतालमा उपचार भइरहेको छ। 

तस्कर समूहका दुईजनालाई प्रहरीले नियन्त्रणमा लिएको छ भने एकजना भागेका छन्। 

‘गैंडाको खाग तस्करीबारे हामीलाई पहिलेदेखि नै सूचना थियो। बिहान पौने ९ बजे सादा पोसाकका प्रहरी होटलमा खटाएका थियौं’, डीएसपी थापाले भने, ‘चारजना कोठाभित्र बसिरहेको समयमा हाम्रो टोलीले बाहिरबाट ढोका बन्द गरेर थप मद्दत जाँदै थियो।’

उनका अनुसार प्रहरीको थप मद्दत टोली पुग्ने क्रममा भित्रबाट तस्कर समूहले ढोका फोडेर भाग्न खोज्ने क्रममा प्रहरीकै हतियार खोसेर चलाउन खोज्दा उनीहरूकै समूहका एकजना घाइते भएका हुन्।