चितवन राष्ट्रिय निकुञ्जभित्र फेरि अर्को गैँडा मृत भेटियो

चितवन राष्ट्रिय निकुञ्जमा फेरि अर्को गैँडा मृत फेला परेको छ । निकुञ्जको भित्री (कोर) इलाकामा ३५ वर्षको भाले गैँडा मृत फेला परेको हो ।

नेपाल समय | मंगलबार, मंसिर १६, २०७७

नेपाल समय

मंगलबार, मंसिर १६, २०७७

चितवन राष्ट्रिय निकुञ्जभित्र फेरि अर्को गैँडा मृत भेटियो

चितवन- चितवन राष्ट्रिय निकुञ्जमा फेरि अर्को गैँडा मृत फेला परेको छ ।

निकुञ्जको भित्री (कोर) इलाकामा ३५ वर्षको भाले गैँडा मृत फेला परेको हो ।

निकुञ्जका सूचना अधिकारी लोकेन्द्र अधिकारीका अनुसार रिउ र राप्ती नदीको दोभानको दक्षिण किनारमा मृतावस्थामा गैँडा फेला परेको हो । सो गैँडा बूढो भएर कालगतिले मरेको आकलन गरिएको छ ।

उक्त गैँडा निकुञ्जको बाघमारा पोष्ट र गोलाघाट क्षेत्रमा नियमितरूपमा देखिने गरेको र रेखदेखमा नै रहेको अधिकारीले जानकारी दिए । उक्त गैँडाको खाग खुर सुरक्षित रहेको छ ।

यससँगै चालु आर्थिक वर्षमा प्राकृतिक कारणले १३ र चोरी शिकारीबाट चार गैँडा मारिएका छन् । यसअघि मंसिर १३ गते शनिबार अर्को एउटा भाले गैँडाको मृत्यु भएको थियो । चुरे पहाड उक्लने क्रममा लडेर घाइते भएको एक सिंगे भाले गैंडाको उपचारका क्रममा मृत्यु भएको हो ।

निकुञ्जमा गैँडा मर्ने र मारिने क्रम बढेपछि निकुञ्जले समिति बनाएर अध्ययन गरिरहेको छ ।

यस विषयमा प्रतिनिधिसभाको कृषि, सहकारी तथा प्राकृतिक स्रोत समितिलेसमेत निकुञ्जको स्थलगत अवलोकन गर्नुका साथै निकुञ्जका कर्मचारी तथा सुरक्षाकर्मी र स्थानीय जनप्रतिनिधिसँग छलफल गरेको छ ।

प्रकाशित: Dec 01, 2020| 02:31 मंगलबार, मंसिर १६, २०७७