अब दिल्लीमा मास्क नलगाउनेलाई २ हजार जरिवाना

काठमाडौं- छिमेकी मुलुक भारतको राजधानी नयाँ दिल्लीमा अब मास्क नलगाइ हिड्नेलाई २ हजार जरिवाना गरिने भएको छ ।

दिल्लीका मुख्यमन्त्री अरविन्द्र केजरीवालले मास्क नलगाई बाहिर हिँड्नेलाई दुई हजार रुपैयाँ जरिवाना गराइने बताएका हुन्।

यसअघि पाँच सय रुपैयाँ मात्रै जरिवाना तोकिएको दिल्लीमा मास्क लगाउन धेरैले बेवास्ता गरेपछि जरिवाना शुल्क बढाइएको मुख्यमन्त्री केजरीवालले बताएका छन् । 

उनले सकभर भीडभाड नगर्न तथा आधारभूत स्वास्थ्य सतर्कता अपनाउन समेत सर्वसाधारणलाई आग्रह गरेका छन् ।

दिल्लीमा अहिले कोभिड १९ महामारीको दोस्रो लहर फैलिँदै गएको छ।

हरेक दिन ७ हजारभन्दा धेरै संक्रमित दिल्लीमा भेटिने गरेको छ । भारतमा बिहीबार ४६ हजार १ सय ८५ जनामा संक्रमण पुष्टि हुँदा दिल्लीमा मात्रै ७ हजार ५ सय ४६ जना संक्रमित भेटिएका छन् ।

दिल्लीमा हालसम्म कोरोनाबाट ५ लाख १० हजारभन्दा धेरै संक्रमित भएका छन् भने ८ हजार ४१ जनाको मृत्यु भएको छ ।