अस्ट्रियाको राजधानी भियनामा आतंककारी हमला, कम्तीमा दुई जनाको मृत्यु

काठमाडौं- अस्ट्रियाको राजधानी भियनामा आतंकवादी हमला भएको छ।

त्यहाँको प्रहरीका अनुसार उक्त हमलामा कम्तीमा दुईजना मारिएको पुष्टि भएको छ। 

अन्य १४ जना घाइते भएको र एकजना आक्रमणकारी पनि मारिएको बीबीसीले उल्लेख गरेको छ।  

राइफलसहित आएका व्यक्तिहरूले छवटा फरक स्थानमा गोली चलाउन थालेको प्रहरीले जनाएको छ।

प्रहरी र आक्रमणकारीहरूबीच गोली हानाहान भएको अनलाइनमा पोस्ट गरिएको भिडियाेमा देखिन्छ।

घटनालाई अस्ट्रियाका चान्सलर जेबास्टियन कुर्ट्सले ‘घृणित आतंवादी हमला’ भनेका छन्।

एक हमलाकारी मारिएका र अर्का एकलाई पक्राउ गरिएको प्रहरीले जनाएको छ। कम्तीमा अर्का एकजना आक्रमणकारीको खोजी भइरहेको बताइएको छ।

एउटा स्थानीय पत्रिकाका अनुसार घाइतेमध्ये यहुदीहरूको प्रार्थनास्थल सिनागगको सुरक्षा गरिरहेका एक सुरक्षाकर्मी पनि रहेका छन्।

सामाजिक सञ्जालमा राखिएको भिडिओ फूटेजमा गोली चलिरहँदा मानिसहरू भागिरहेको देखिन्छ।