होम आइसोलेसनमै दुई जनाको मृत्यु, नेपालगञ्जमा एक संक्रमितको निधन

काठमाडौं- नवलपरासीमा दुई जनाको होम आइसोलेसनमा मृत्यु भएको छ।

कोरोना संक्रमणपछि होम आइसोलेनमा बसेका पूर्व कावासोती नगरपालिका ६ का ६८ वर्षीय पुरुष र गैंडाकोट नगरपालिका २ का ७७ वर्षीया महिलाको होम आइसोलेसनमा शनिबार बिहान मृत्यु भएको स्वास्थ्य कार्यालय नवलपुरले जनाएको छ। 

मृतक दुबैको सुरक्षा निकाय, स्वास्थ्यकर्मी तथा जनप्रतिनिधिको निगरानीमा घर परिवारले नै दाहसंस्कार गर्ने कार्यालयका प्रमुख केशव चापागाईंले बताएका छन्।  

यस्तै नेपालगञ्जमा उपचाररत कोरोना संक्रमित एक वृद्धको मृत्यु भएको छ। बाँकेको नेपालगञ्जमा उपचाररत दाङका एक कोरोना संक्रमित वृद्धको मृत्यु भएको हो।

घोराही उपमहानगरपालिका ४ निवासी ७० वर्षीय पुरुषको नेपालगञ्ज मेडिकल कलेज कोहलपुरमा शनिबार बिहान ५ बजे मृत्यु भएको बाँकेका कोरोना फोकल पर्सन नरेश श्रेष्ठले जनाएका छन्। 

कात्तिक ११ गतेदेखि नै आइसियूमा उपचार भइरहेका उनलाई १२ गते बेलुका मात्रै कोरोना संक्रमण पुष्टि भएको थियो।