‘देहरादुनबाट यातनापीडित बालबालिका फर्काउने प्रक्रिया सुरु’

काठमाडौं– भारतका लागि नेपाली राजदूत नीलाम्बर आचार्यले  देहरादुनस्थित गुम्बामा यातना भोगेका बालबालिकालाई त्यहाँबाट स्वदेश फर्काउन प्रक्रिया सुरु भएको जनाएका छन्। 

उनले कुटपिट गर्ने अध्यापकलाई कारबाहीका लागि र फर्कन चाहने विद्यार्थीलाई सुरक्षित फर्काउन प्रक्रिया सुरु भएको जनाएका हुन्। 

उनले ट्विटरमा लेखेका छन्, ‘यसका लागि आधिकारिक एवं सहयोगी संस्था र व्यक्तिहरूको सक्रियतामा आवश्यक कदम चालिएका छन्।’

केही अभिभावकसँग कुराकानी भएकाले चाँडै समस्या समाधान हुने उनको भनाइ छ। 

देहरादुनस्थित एउटा बौद्ध गुम्बाको आश्रममा ५९ नेपाली बालबालिकामाथि त्यहाँका प्राध्यापकले केही दिनअघि निर्मम यातना दिएको समाचार सार्वजनिक भएको थियो।

ती बालबालिकालाई नेपालका विभिन्न जिल्लाबाट त्यहाँ पुर्‍याइएको थियो। बालबालिकाको उद्धारका लागि सरकारमाथि चर्को दबाब परेपछि उद्धारका लागि दूतावास सक्रिय भएको हो।