कमल थापा भन्छन्, ‘नेपाल अन्तर्राष्ट्रिय शक्तिको प्रतिस्पर्धास्थल बन्ने खतरा बढ्यो’

काठमाडौं– राष्ट्रिय प्रजातन्त्र पार्टी (राप्रपा) का अध्यक्ष कमल थापाले नेपाल अन्तर्राष्ट्रिय शक्तिहरुको प्रतिस्पर्धास्थल बन्ने खतरा बढेको बताएका छन्।

पूर्वपरराष्ट्रमन्त्रीसमेत रहेका थापाले शुक्रबार ट्विट गर्दै सत्तारुढ र प्रमुख प्रतिपक्षी दलका अकर्मण्यता र गलत नीतिको परिणामस्वरूप यस्तो खतरा बढेको बताएका हुन्।

प्रधानमन्त्री केपी शर्मा ओलीले भारतीय खुफिया एजेन्सी रअका प्रमुख सामन्तकुमार गोयललाई भेटेको विषय विवादित बनेका बेला उनले थापाको यस्तो धारणा आएको छ।

‘भारत र चीनसँगको सम्बन्धमा रणनीतिक सन्तुलन, समदूरी र असंलग्नता नेपालको अस्तित्वको आधार हो,’ उनले भनेका छन्, ‘तर, सत्तारुढ र प्रमुख प्रतिपक्ष दलका अकर्मण्यता र गलत नीतिको परिणामस्वरूप अहिले नेपाल अन्तर्राष्ट्रिय शक्तिहरूको प्रतिस्पर्धास्थल बन्ने खतरा बढेको छ।’

थापाले देशको स्वतन्त्रता र अस्तित्ववारे समयमै सचेत बन्नुपर्ने धारणा पनि राखेका छन्।