अस्पतालहरूको चर्को शुल्क नियन्त्रण गर्न विराटनगर कांग्रेसको माग 

विराटनगर- विराटनगरका निजी अस्पतालहरूले कोरोना संक्रमितको उपचारको नाममा मनोमानी रुपमा लिइरहेको चर्को शुल्क नियन्त्रण गर्न नेपाली कांग्रेस विराटनगर समितिले माग गरेको छ। 

बिहीबार विराटनगरमा पत्रकार सम्मेलन गरी महानगर समितिले कोरोनाको उपचारका नाममा  निजी अस्पतालहरूले मनोमानी रुपमा लिइरहेको चर्को शुल्क सरकारले नियन्त्रण नगरे चरणबद्ध आन्दोलन गर्ने चेतावनीसमेत दिएको छ।

महानगर समितिका कार्यबाहक सभापति अरुण न्यौपानेले पहिलो चरणमा निजी अस्पतालले कोरोनाको उपचारका नाममा मनोमानी रुपमा लिइरहेको चर्को शुल्क घटाउन, उपचार गर्न जाँदा पहिलै धरौटी राख्नुपर्ने व्यवस्था हटाउन र कोरोना उपचार गर्ने अस्पतालको अनुगमन गर्न नगरसमितिले माग राखेको बताए।

आफूहरूले राखेको माग पूरा नभए चरणबद्ध आन्दोलनमा उत्रन बाध्य हुने उनले बताए। 

यसैबीच कोरोना संक्रमितले उपचार नपाएर ज्यान गुमाउनु परेका घटना बढेपछि संघीय सांसद राजेन्द्रप्रसाद लिङ््देनले झापाका अस्पतालहरुको स्थलगत अनुगमन शुरु गरेका छन्।

लिङदेनले बिहीबार मेची प्रादेशिक अस्पताल भद्रपुर, ओम साई पाथीभरा हस्पिटल भद्रपुर, बिएण्डसी हस्पिटल बिर्तामोड र मनमोहन सामुदायिक अस्पताल बिर्तामोडको अनुगमन गर्दै बिरामी अवस्थाको बारेमा अस्पताल प्रशासन पक्षसँग जानकारी लिएका छन्। 

कोरोना कहरबीच सामान्य र दीर्घरोगका बिरामीहरूले समेत उपचार नपाई ज्यान गुमाउनुपर्ने अवस्था आएपछि अनुगमन सुरु गरेको लिङ्देनले बताए।