प्रदेश १ मा १३४ कोरोना संक्रमित थपिए, ७० डिस्चार्ज

विराटनगर- पछिल्लो २४ घण्टामा प्रदेश १ मा १३४ जना कोरोना संक्रमित थपिएका छन्। सुनसरीमा ५७, मोरङमा ४२, झापामा ३१, तेह्रथुममा १ र प्रदेश १ बाहिरका ३ जनामा संक्रमण देखिएको सामाजिक विकास मन्त्रालयले जनाएको छ। 

सुनसरीको धरानमा ४७, इटहरीमा ७, रामधुनी, गढी र स्थानीय तह नखुलेका १–१ जना, मोरङको विराटनगरमा ३२, बुढीगंगामा २, कानेपोखरी, सुन्दरहरैचा र बेलबारीमा १–१ र स्थानीय तह नखुलेका ५ जनाको रिपोर्ट पोजेटिभ आएको छ। 

झापाको भद्रपुर र विर्तामोडमा ८–८, मेचीनगर र कनकाईमा ३–३, शिवसताक्षीमा २, बुद्धशान्ति, अर्जुनधारा, कमल र झापा गाउँपालिकामा १–१ र स्थानीय तह नखुलेका ३, तेह्रथुमका १ र प्रदेश १ बाहिरका ३ जनामा संक्रमण देखिएको सामाजिक विकास मन्त्रालयले जनाएको छ। प्रदेश १ मा कोरोना संक्रमितको संख्या १८ हजार ३८४ पुगेको छ। 

प्रदेश १ मा बिहीबार ७० जना डिस्चार्ज भएका छन्। कालीसदन आइसोलेसन र मारवाडी सेवा सदन आइसोलेसनबाट २५–२५, बैजनाथपुर आइसोलेसन र विराट मेडिकल कलेजबाट १०–१० जना डिस्चार्ज भएका हुन्। हालसम्म १० हजार १७९ जना डिस्चार्ज भएका छन्।

प्रदेश १ मा बिहीबार ४४२ जनाको पीसीआर परीक्षण गरिएको छ। परीक्षण गरिएकामध्ये ६४ महिला र ७० पुरुषको रिपोर्ट पोजेटिभ आएको हो। हालसम्म १ लाख ५६ हजार ९८८ जनाको पीसीआर परीक्षण गरिएको सामाजिक विकास मन्त्रालयले जनाएको छ।