झण्डै ३०० थान स्मार्ट लाइसेन्स धान खेतमा

जनकपुरधाम-  जनकपुरमा झण्डै ३०० थान नयाँ स्मार्ट लाइसेन्स (सवारी चालक अनुमति पत्र) धानखेतमा फालिएको अवस्थामा फेला परेको छ।

जनकपुरधामको मुजेलियास्थित यातायात कार्यालबाट करिब दुई सय मिटर पर धान खेतमा फालिएका ती लाइसेन्स धान काट्न गएका महिलाले फेला पारेका हुन्। उनीहरुले लाइसेन्स संकलन गरेर यातायात कार्यालयलाई बुझाएका छन्।

यातायात व्यवस्था विभाग काठमाडौंबाट तयार भएर वितरणका लागि जनकपुर पठाइएका लाइसेन्स धान खेतमा फेला परेपछि कार्यालयको सुरक्षामाथि नै प्रश्न उठेको छ ।

लाइसेन्स फेला पारेकी एक कृषक महिलाले भनिन्, ‘बुधबार दिउँसो धान काट्न आउँदा खेतमा जताततै लाइसेन्स छरिएको थियो, सबै जम्मा गरेर यातायातका कर्मचारीलाई दिएका छौं।’

 यातायात कार्यालय जनकपुरधामका अधिकृत वीरेन्द्र साहले लाइसेन्स धान खेतमा फेला परेको स्वीकार गर्दै तीन सय थान जति भेटिएको जानकारी दिए।

साहले भने, ‘कसैले गलत नियत राखेर लाइसेन्स फालेको हुन सक्छ । यसबारे जिल्ला प्रशासन कार्यालय धनुषालाई जानकारी गराएका छौं।’

यातायात कार्यालय जनकपुरधाममा दलाल र बिचौलियाको सहज पहुँच छ। तिनले लाइसेन्ससहितका कागजात बोकेर आफूखुशी ओहोरदोहोर गरे पनि यातायात कार्यालयका कर्मचारी मूकदर्शक बन्ने गरेको सेवाग्राही बताउँछन् ।