नियम उल्लंघन गरेर ट्राफिकलाई पैसा दिन खोज्ने आठ जनामाथि कारबाही

काठमाडौं-  ट्राफिक प्रहरीलाई आर्थिक प्रलोभनमा पार्न खोज्दा सवारी चालक तथा सहचालक आफैं कारबाहीमा परेका छन्। 
दसैंका अवधिमा सवारी नियम उल्लंघनविरुद्ध चलाइएको कारबाही अभियानका क्रममा नियम उल्लंघन गर्ने उनीहरुले प्रहरीलाई नै पैसा दिन खोजेपछि  कारबाही गरिएको छ । 
यसरी कारबाहीमा पर्नेमा आठ सवारी चालक तथा सहचालक रहेको महानगरीय ट्राफिक प्रहरी महाशाखाले जनाएको छ। 
कारबाहीमा पर्नेमा रामप्रसाद चौधरी, दीपकबहादुर कुमाल, अभिनन्दन काफ्ले, विक्रम तामाङ, प्रेमबहादुर तामाङ, खड्गबहादुर सुनुवार, अभिक आचार्य र अविन शाही  छन्। उनीहरुले सवारी नियम उल्लंघन गरेपछि कारबाही गर्न खोज्ने ट्राफिक प्रहरीलाई ५०० देखि तीन हजार रुपैयाँसम्म दिन खोजेका थिए।

महाशाखाले कुनै प्रलोभनमा नपरी आर्थिक लाभ इन्कार गरेर संलग्नलाई नियमानुसार कारबाहीका दायरामा ल्याउने ती ट्राफिक प्रहरीलाई पुरस्कृतसमेत गरेको महाशाखाका प्रमुख प्रहरी वरिष्ठ उपरीक्षक भीमप्रसाद ढकालले बताए। उनका अनुसार दिइएको जिम्मेवारी इमान्दारीसाथ निर्वाह गर्ने ट्राफिक प्रहरीलाई प्रोत्साहनस्वरुप पुरस्कृत गर्ने गरिएको छ। रासस