प्रहरी प्रधान कार्यालयमा दसैंको मौलो पूजा 

काठमाडौं- प्रहरी प्रधान कार्यालय नक्साल काठमाडौंमा बडा दसैंको अवसरमा मौलो पूजा सम्पन्न भएको छ।

प्रहरी अतिरिक्त महानिरीक्षक हरिबहादुर पालले नेपाल प्रहरीले मनाउँदै आएको बडा दसैंका अवसरमा आज प्रहरी प्रधान कार्यालय सशस्त्र प्रहरी गण नम्बर १ नक्सालस्थित मौलोमा पूजाअर्चना तथा संकल्प पूजा गरेका हुन्। 

पूजाअर्चनाको क्रममा प्रहरी अतिरिक्त महानिरीक्षक पालले निसानमा पञ्जा छाप लगाए। उनले मौलो पूजाका अवसरमा विशेष कार्य गर्ने प्रहरी सहायक निरीक्षक भवानी चन्द र प्रहरी हवल्दार जितेन्द्र खाँ थारुलाई पगरी तथा नगद पुरस्कार प्रदान गरे। 

पूजा विसर्जनपछि मूलकोत हनुमानढोकाको लागि निशान प्रस्थान गराइएको थियो। उक्त अवसरमा उपस्थितलाई पूजारीबाट टीका तथा प्रसाद वितरण गरिएको थियो । 

सो अवसरमा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, वरिष्ठ प्रहरी अधिकृतलगायतको उपस्थिति थियो। नेपाल प्रहरीले हरेक वर्ष बडादसैंको अवसरमा मौलो पूजा गर्दै आइरहेको छ।