दसैैंमा पार्थिव महादेवको पूजा

जनकपुरधाम– देशैभर अहिले दसैँको रमझम छ। मिथिलामा दसैँको अलग्गै महत्व छ। 

मिथिलाञ्चलमा दसैँको बेला माता दुर्गाका ९ अवतारका पूजा त हुन्छन् नै, त्यसका साथै पार्थिव महादेवको विशेष पूजा गर्ने परम्परा छ । मिथिलाञ्चलको घरघरमा अहिले माता दुर्गाका अवतारहरुको पूजाका साथै पार्थिव महादेवको पूजा गरिँदै आएको छ । 

दशैँको बेला ९ दिन घरका सदस्यहरु एकाबिहानै उठेर माटोको महादेव बनाउन व्यस्त हुने महोत्तरीको पिपरा गाउँपालिका बनौलीकी भावना झाले बताइन् ।

उनी भन्छिन्, ‘दशैँमा माता दुर्गाको पूजा त गर्छौँ नै त्यसका साथै पार्थिव महादेव बनाएर महादेवको पूजा समेत अनिवार्य रुपमा गर्ने गर्छौँ ।’ असोज महिनाको शारदीय नवरात्रीको समयमा महादेवको पूजा गर्नुको अलग्गै महत्व रहेको उनको भनाइ छ । 

शिव पुराणका अनुसार शिव पूजनले धन्यधान्य र अरोग्यका साथै पुत्र प्राप्ति हुने गर्छ । ‘जो दम्पति पुत्र प्राप्तीका लागि वर्षोदेखि दुःखी छन्, उनीहरुले विशेष रुपले पार्थिव महादेवको पूजा गर्नु पर्छ,’ महोत्तरीको महोत्तरी गाउँपालिका पर्साका पण्डित द्रवेश ठाकुरले बताए ।