उपत्यकामा आज १५ सय ५२ संक्रमित थपिए, सक्रिय संक्रमित २३ हजार बढी

काठमाडौं- पछिल्लो २४ घण्टामा काठमाडौं उपत्यकामा ३ जिल्लामा १ हजार ५५२ जनामा कोरोना संक्रमण पुष्टि भएको छ। जसमध्ये महिला ५२५ जना र पुरुष १ हजार २७ जना छन्।

यसैबीच उपत्यकामा मात्रै कोरोनाका सक्रिय संक्रमितको संख्या झण्डै २३ हजारभन्दा बढी पुगेको छ।

स्वास्थ्य तथा जनसंख्या मन्त्रालयको पछिल्लो विवरणअनुसार उपत्याकाका ३ जिल्ला काठमाडौं, ललितपुर र भक्तपुरमा गरी २३ हजार २५५ सक्रिय संक्रमित छन्।

जसमध्ये काठमाडौंमा मात्रै १८ हजार ९६२ सक्रिय संक्रमित छन्। त्यस्तै भक्तपुरमा १ हजार ३०९ र ललितपुरमा २ हजार ९८४ सक्रिय संक्रमित छन्।

काठमाडौंमा १० हजार ५०१, भक्तपुरमा १ हजार ५६२ ललितपुरमा २ हजार ७४८ जना होम आइसोलेसनमा छन्। बाँकी संस्थागत आइसोलेसनमा रहेका छन्।

उपत्यकामा ३ जिल्लामा अहिलेसम्म ६४ हजार १३३ जनामा कोरोना पुष्टि भइसकेको छ। जसमध्ये २८२ जनाको मृत्यु भएको छ।