कर्णालीमा नेकपा विवाद : मन्त्री रावल र बुढाको पद धरापमा  

सुर्खेत- कर्णाली प्रदेश सरकारका सामाजिक विकास मन्त्री दल रावल र उद्योग, पर्यटन, वन तथा वातावरण मन्त्री नन्दसिंह बुढाको पद धरापमा परेको छ। 

संसदीय दलका नेता एवम् मुख्यमन्त्री महेन्द्रबहादुर शाही पक्षले बोलाएको संसदीय दलको बैठक बहिस्कार गरेसँगै मन्त्रीद्वयको पद धरापमा परेको हो। 

मुख्यमन्त्री बिरुद्धको अविश्वासको प्रस्तावमाथि छलफलका लागि बोलाएको बैठकमा मन्त्री रावल र बुढा सहभागी नभएपछि दुबै जना सरकारबाट बाहिरिने े चर्चा चलेको छ। दुबै मन्त्री नेकपा अध्यक्ष एवम् प्रधानमन्त्री केपी शर्मा ओली समूहका हुन्। 

शुक्रबार बसेको दलको बैठकले मुख्यमन्त्री विरुद्ध परेको अविश्वासको प्रस्ताव अस्वीकृत गरेको थियो। तर दलको बैठकमा भने बहालवाला मन्त्रीसहित १४ जना सांसद सहभागी भएनन्। बिद्रोही सांसदसहित मन्त्रीद्वयले पनि बैठक बहिस्कार गरेका थिए।

मुख्यमन्त्री शाहीले पनि दसैंअघिसम्म मन्त्रीमण्डल फेरबदल गर्ने संकेत गरेका छैनन्। मुख्यमन्त्री निकट एक सांसदका अनुसार अविश्वासको प्रस्ताव फेल भएको पार्टी हेडक्वाटरको सिग्नलपछि मात्रै बाँकी निर्णय गर्ने जनाइएको छ।

तर पहिले अविश्वासको प्रस्तावमा हस्ताक्षर गरेका र आजको बैठकमा मुख्यमन्त्री शाहीको पक्षमा उभिएको नेकपाका बरिष्ठ नेता माधव नेपाल समूह भने छिट्टै मन्त्रीमण्डल गठन गर्नुपर्ने पक्षमा छ। 

मुख्यमन्त्री शाहीले असोज २७ गते नै अविश्वासकको प्रस्तावको विपक्षमा उभिएका सांसद कुर्मराज शाहीलाई नेकपा संसदीय दलको सचेतक नियुक्त गरिसकेका छन्। 

मन्त्रिमण्डल विस्तार भएको खण्डमा नेपाल समूहका सांसदह चन्द्रबहादुर शाही, अमरबहादुर थापा, करविर शाही र पद्मा खड्कामध्ये तीन जना मन्त्री बन्ने स्पष्ट संकेत देखिएको छ।