गण्डकी प्रदेशका मन्त्रीको दसैंभत्ता कोरोना कोषमा  

पोखरा– गण्डकी प्रदेश सरकारका मन्त्रीहरूले दसैंभत्ताबापतको रकम कोरोना कोषमा जम्मा गरेका छन्। 

प्रदेशको बुधबार बिहान बसेको मन्त्रिपरिषद् बैठकले दसैं‌भत्ताबापतको रकम प्रदेशको कोभिड कोषमा जम्मा गर्ने निर्णय गरेको बैठकपछि सरकारका प्रवक्तासमेत रहेका भौतिक पूर्वाधार विकासमन्त्री रामशरण बस्नेतले जानकारी दिए। 

गण्डकी प्रदेशका मन्त्रीहरुले यसअघि पनि एक महिनाको पारिश्रमिक कोभिड कोषमा जम्मा गरेको थियो।

मन्त्री बस्नेतले कोरोना उपचारका सन्दर्भमा सामाजिक सञ्जालमा आएका विभिन्न क्रिया र प्रतिक्रियामा विश्वास नगर्न आग्रह गरेका छन्। 

गण्डकी प्रदेशमा कोरोना भाइरस संक्रमित बिरामीको उपचार निःशुल्क भइरहेको छ।  उनले भने, ‘कोरोना उपचारमा यसअघि जस्तो व्यवस्था थियो, त्यस्तो व्यवस्था कायमै छ।’

प्रदेश सरकारले कोरोना महामारीका बेला चाडबाडमा भीडभाड नगर्न र सामाजिक दूरी कायम गरी आफ्नो स्वास्थ्यमा विशेष ख्याल गर्न आग्रह गरेको छ।