कांग्रेस भन्छ– प्रधानमन्त्रीज्यू संवेदनशील बन्नुस्, निर्णय सच्याउनुस्

काठमाडौं– प्रमुख प्रतिपक्ष दल नेपाली कांग्रेसले कोरोनाको उपचार नगर्ने निर्णय सच्याउन सरकारलाई आग्रह गरेको छ। 

सोमबार विज्ञप्ति निकाल्दै परीक्षण र उपचारको दायित्वबाट पन्छिने सरकारी निर्णयलाई नेपाली कांग्रेसले अत्यन्तै गैरजिम्मेवार व्यवहार भएको बताएको हो। 

‘कोरोनाले जनताको आर्थिक जीवनमा परेको असर दृष्टिगत गरेर सबैको दायित्व सम्हाल्ने कर्तव्य सरकारको हो,’ विज्ञप्तिमा भनिएको छ, ‘संक्रामक रोग उपचारको कानूनी व्यवस्था अनुरुप पनि सरकार जिम्मेवारीबाट पन्छिन मिल्दैन, नागरिकको उपचार सरकारी खर्चमै गर्नुपर्छ।’

सर्वोच्च अदालतले निःशुल्क प्रबन्ध मिलाउन दिएको आदेशसमेत पालना नगरेर सरकारले कानुनी शासन र जनताप्रतिको संवेदनशीलता गुमाएको कांग्रेसको भनाइ छ। 

कांग्रेसले सांसद विकास कोष, दसैं भत्तालगायत खारेज गरेर जनताको जीवन जोगाउन लगानी बढाउनु सरकारको कर्तव्य भएको बताएको छ। 

कोरोना परीक्षण र उपचार निःशुल्क गरेर महामारीबाट जनतालाई जोगाउन विशेष संवेदनशीलताका लागि प्रधानमन्त्री र सरकारलाई कांग्रेसले अपिल पनि गरेको छ।