जस्केलाबाट सत्तामा छिरेर तुजुक नदेखाउन बाबुरामको चेतावनी

काठमाडौं- पूर्वप्रधानमन्त्री एवम् जनता समाजवादीका नेता डा. बाबुराम भट्टराईले सत्ताको तुजुक नदेखाउन नेकपा नेताहरुलाई चेतावनी दिएका छन्। 

केही दिनअघि डा. भट्टराई बूढीगण्डकी आयोजनाको नौ अर्ब रुपैयाँ प्रधानमन्त्री केपी शर्मा ओली, पूर्वप्रधानमन्त्रीद्वय शेरबहादुर देउवा र पुष्पकमल दाहालले बाँडेर खाएको र त्यसको प्रमाण आफूसँग रहेको सार्वजनिक अभिव्यक्ति दिएका थिए।

उनको सो भनाइको बुधबार नेकपा प्रवक्ता नारायणकाजी श्रेष्ठले खण्डन गर्दै त्यसमा सत्यता नभएको स्पष्ट पारेका थिए।

तर डा. भट्टराईले नेकपा प्रवक्ताको भनाइ नै असत्य रहेको आशय व्यक्त गर्दै  बूढीगण्डकी, एनसेल, वाइडबडी, सुरक्षा प्रिन्टिङ, यती,ओम्नी लगायत सबै ठूला भ्रष्टाचार काण्डको छानबिन र दण्डसजाय गर्न अधिकारसम्पन्न जनलोकपाल गठन गर्न आग्रह गरेका हुन्।

उनले सबै उच्च पदासीनहरूको सम्पत्ति छानबिन गर्न आग्रह गर्दै आफू पूर्ण सहयोग गर्न र दोषी ठहरे दण्डित हुन तयार रहेको बताएका छन्।

डा. भट्टराईले ट्विटरमा लेखेका छन्, 'जस्केलाबाट छिर्नेहरूले सत्ताको तुजुक नदेखाऊँ।'

भट्टराईको यो भनाइ नेकपा प्रवक्ता श्रेष्ठमाथि लक्षित छ। गोरखाबाट प्रतिनिधिसभा निर्वाचन हारेका श्रेष्ठ हाल राष्ट्रिय सभा सदस्य छन्।

कांग्रेसले पनि भट्टराईको अभिव्यक्तिको यसअघि नै खण्डन गरेको छ।

बुढीगण्डकी,एनसेल,वाइडबडी,सुरक्षा प्रिन्टिंग,यति,ओम्नी लगायत सबै ठूला भ्रष्टाचार काण्डको छानवीन र दण्डसजाय गर्न अधिकारसम्पन्न जनलोकपाल गठन गरौं।सबै उच्च पदासीनहरूको सम्पत्ति छानवीन गरौं।म पूर्ण सहयोग गर्न र दोषी ठहरे दण्डित हुन तयार छु।जस्केलाबाट छिर्नेहरूले सत्ताको तुजुक नदेखाऊॅ! pic.twitter.com/WbWX664bzQ

— Baburam Bhattarai (@brb1954) October 14, 2020