दाहालको सचिवालयले भन्यो– कर्णाली प्रदेशमा देखिएको अराजनीतिक गतिविधि असफल भयो

काठमाडौं– सत्तारुढ दल नेकपाका अध्यक्ष पुष्पकमल दाहालको सचिवालयले कर्णाली प्रदेशमा देखिएको अराजनीतिक गतिविधि अन्ततः असफल भएको टिप्पणी गरेको छ।

दाहालको सचिवालय सदस्यसमेत रहेकी छोरी गंगा दाहालले फेसबुकमा यस्तो टिप्पणी गरेकी हुन्। 

‘कर्णाली प्रदेशमा देखिएको एक अराजनीतिक गतिविधि अन्ततः असफल भएको छ,’ उनले लेखेकी छिन्। पार्टी एकताका लागि नेतृत्वले देखेको सपना साकार पार्न सकारात्मक भूमिका खेल्ने सबैलाई उनले बधाई समेत दिएकी छिन्।

कर्णाली प्रदेशसभाका १८ सांसदले आइतबार मुख्यमन्त्री महेन्द्रबहादुर शाहीविरुद्ध अविश्वासको प्रस्ताव दर्ता गरेका थिए। प्रधानमन्त्री केपी शर्मा ओली, वरिष्ठ नेता माधवकुमार नेपाल र दाहालका समेत गरेर १८ जनाले अविश्वासको प्रस्ताव ल्याएका थिए। 

सोमबार माधव नेपाल समूहसँग भएको छलफलमा तीनवटा मन्त्री र सचेतक दिने सहमतिपछि नेपाल समूहका सांसद पछि हटेका छन्।

नेपाल समूहका सांसद पछि हटेपछि शाहीको बहुमत पुग्ने र देखिएको संकट समाधान हुने भएपछि दाहाल सचिवालयले यस्तो टिप्पणी गरेको हो।