कोरोनाबाट ५ हजार ११० प्रहरी संक्रमित, १९ सय ५६ अस्पतालमा 

काठमाडाैं- कोरोना भाइरसबाट संक्रमित हुने प्रहरीको संख्या ५ हजार १ सय १० पुगेको छ । 

नेपालमा समुदाय स्तरमा संक्रमण फैलिएसँगै दैनिक २० देखि २५ जना प्रहरी कोरोनाबाट संक्रमित हुने गरेका छन् । पछिल्लो २४ घण्टामा मात्रै २३ जना प्रहरी संक्रमित भएका छन् । 

हालसम्म संक्रमित भएकामध्ये ३१ सय ८४ जना निको भैसकेका छन् भने १९ सय ५६ जना उपचाररत छन् । उनीहरुको विभिन्न अस्पतालमा उपचार भैराखेको केन्द्रीय प्रहरी प्रवक्ता कुवेर कडायतले जानकारी दिए । 

उनकाअनुसार काठमाडौं उपत्यकामा मात्रै १८ सय ६९ जना प्रहरी संक्रमित भएका छन् । जसमध्ये ६ सय ९२ जना उपचाररत छन् भने ११ सय ७७ संक्रमणमुक्त भएका छन् । प्रहरी प्रधान कार्यालयमै ३४२ जना कोरोनाका सक्रिय संक्रमित छन् ।

यस्तै प्रदेश १ मा ११८ जना, प्रदेश २ मा ८७ जना, वाग्मती प्रदेशमा १५८ जना, गण्डकी प्रदेशमा १९५ जना, लुम्बीनी प्रदेशमा १९१ जना, कर्णाली प्रदेशमा ४८ जना र सुदूरपश्चिम प्रदेशमा १२५ जना प्रहरी कोरोनाका सक्रिय संक्रमित छन् ।