नोर्बु लामा सेकेन्ड क्लास रेफ्री लाइसेन्स पाउने पहिलो नेपाली

काठमाडौं– तेक्वान्दोका नोर्बु लामा पुम्से विधाको सेकेन्ड क्लास अन्तर्राष्ट्रिय रेफ्री बनेका छन्। लामा पुम्सेको सेकेन्ड क्लास अन्तर्राष्ट्रिय रेफ्रीको लाइसेन्स पाउने पहिलो नेपाली रेफ्रीसमेत हुन्।

सेकेन्ड क्लास अन्तर्राष्ट्रिय रेफ्रीको लाइसेन्सका लागि विश्व तेक्वान्दो (डब्लुटी)ले मान्यता दिएको प्रतियोगिताका साथै रिफ्रेसर कोर्समा सहभागी हुनुपर्ने प्रावधान छ।

यसका लागि कम्तीमा ३ वर्षको अनुभवका साथै रेफ्रीसँग डब्लूटीको मूल्यांकनबाट ५ अंक हासिल गर्नु पर्नेछ। यो अंक विभिन्न अन्तर्राष्ट्रिय प्रतियोगिताबाट प्राप्त हुनेछ।

लामाले २००८ मा बैंकक, २०१२ मा मलेसिया, २०१२ र २०१५ मा चीन तथा २०१९ मा अस्ट्रेलियामा भएको अन्तर्राष्ट्रिय रेफ्री रिफ्रेसर कोर्समा सहभागिता जनाएका थिए।

त्यस्तै,  उनले २०१९ मै अस्ट्रेलियामै भएको प्रेसिडेन्ट कप अन्तर्राष्ट्रिय तेक्वान्दो प्रतियोगितामा रेफ्रीको भूमिका निर्वाह गरेका थिए। नेपाल तेक्वान्दो संघका अध्यक्ष प्रकाशशमशेर राणाले लामालाई डब्लुटीबाट प्राप्त प्रमाण पत्र शुक्रबार हस्तान्तरण गरे।

कोरोना माहामारीका कारण विश्वमा खेल गतिविधि रोकिँदा तेक्वान्दो–पुम्सेको भने भर्चुअल विश्व च्याम्पियनसिप समेत सम्पन्न भएको छ। नेपालले पनि सहभागिता जनाएको विश्व च्याम्पियनसिपको एक विधा (पुरुष ३० वर्षभन्दा कम उमेर समूह)मा स्वर्ण, रजत र काश्य पदक प्राप्त गरेको थियो।

लकडाउनले धेरै खेला प्रभावित हुँदा पुम्से खेल भने अनलाइनबाट सञ्चानल हुन थालेका छन्।