जर्मन सुपर कपको उपाधि बायर्नलाई

काठमाडौं– जर्मन सुपर कपको उपाधि बायर्न म्युनिखले जितेको छ। उसले फाइनलमा बोरुसिया डर्टमन्डलाई ३–२ गोल अन्तरले हराउँदै उपाधि जितेको हो।

जितका लािग कारेन्टिन टोलिस्सो, थोमस मुलर र जोसुवा किमिचले समान १–१ गोल गरे। खेलको १८ औं मिनेटमा गोल गर्दै टोलिस्सोले बायर्नलाई सुरुवाती अग्रता दिलाएका थिए। त्यस्तै ३२ मिनेटमा मुलरले गोल गर्दै अग्रतालाई दोब्बर बनाए।

यता खेलको ३९ औं मिनेटमा जुलियन ब्राण्डले गोल गर्दै डर्टमन्डलाई खेलमा फर्काएका थिए। ब्राण्डको गोलसँगै पहिलो हाफमा डर्टमुन्ड २–१ गोलले पछि पर्यो।

दोस्रो हाफको ५५ औं मिनेटमा इर्लिङ ब्रुट हाल्यान्डले गोल गर्दै खेललाई बराबरीमा ल्याए। तर ८२ औं मिनेटमा किमिचले गोल गर्दै बायर्नलाई ३–२ गोलको जित दिलाए।

बुधबार रातिको जितसँगै जारी सिजनमा बायर्नले दुई उपाधि जितेको छ। उसले यसअघि स्पेनिस क्लब सेभियालाई हराउँदै आठौं पटक सुपरकपको उपाधि जितेको थियो।